Սպանություն Երևանում. ամուսինը խեղդամահ է արել կնոջը. մանրամասներ

Այսօր՝ հոկտեմբերի 31-ին, սպանություն է տեղի ունեցել Երևանում: Ժամը 13:50-ի սահմաններում ոստիկանության Էրեբունու բաժին ահազանգ է ստացվել, որ Սուվորովի փողոցի տներից մեկում կնոջ դի կա, իսկ մեկ հոգի էլ՝ վիրավոր:  

Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ոստիկանության Երևան քաղաքի վարչության պետի օպերատիվ գծով տեղակալ  Արթուր Զաքարյանը, նույն վարչության քրեական հետախուզության բաժնի պետ Հովհաննես Արիստակեսյանը: Ժամանել է նաև  ոստիկանության Էրեբունու բաժնի օպերատիվ  խումբը՝ բաժնի պետ Արմեն Գասպարյանի գլխավորությամբ:

Օպերատիվորեն  ժամանել են նաև Հայաստանի քննչական կոմիտեի Երևան քաղաքի քննչական վարչության Էրեբունի և  Նուբարաշեն վարչական շրջանների քննչական խումբը՝ բաժնի պետ Համբարձում Պետրոսյանի, բաժնի պետի տեղակալ Արտակ Մկրտչյանի գլխավորությամբ: Ոստիկաններն ու քննիչները նշված տան խոհանոցում՝ հատակին, հայտնաբերել են կնոջ դի:

Այս պահին դեպքի վայրում զննություն են կատարում հատկապես կարևոր գործերով ավագ քննիչներ Յուրա Պապյանը և Մկրտիչ Ումրշատյանը:

Փաստի առթիվ Էրեբունու քննչական բաժնում ՀՀ քր օր-ի 104 հոդվածի 1-ին մասի հատկանիշներով հարուցվել է  քրեական գործ և ստեղծվել է քննչական խումբ: Դեպքի վայր է ժամանել նաև Երևան քաղաքի քննչական վարչության պետ Մհեր Վարդանյանը  և ՀՀ ոստիկանության պարեկային ծառայության պետ Արթուր Ումրշատյանը: Քիչ առաջ պարեկային ծառայության Երևանի գնդի  1-ին գումարտակի 1-ին  և 2-րդ վաշտերի ծառայողները ՝ գումարտակի հրամանատար  Արամ Դադոյանի, վաշտերի հրամանատարներ  Հարություն Գրիգորյանի, Նիկոլայ Ավետիսյանի և Գևորգ Թորոսյանի ուղեկցությամբ, ոստիկանության Էրեբունու բաժնի օպերատիվ խմբի հետ նշված տանից հիվանդանոց  տեղափոխեցին մի տղամարդու: