Սյունիքում ՔՊ-ականները անցել են բացահայտ տեռորի, որպեսզի իրենց թեկնածուին ստիպեն ընտրել: Բնականաբար, առաջին հերթին ճնշումների են ենթարկում այն պաշտոնյաներին, որոնք չեն համաձայնում նոյեմբերի 14-ին Կապանում կայանալիք ՏԻՄ ընտրությունների ժամանակ հօգուտ ՔՊ-ական թեկնածուի քարոզչություն իրականացնել։
Երեկ տեղեկություն ստացանք, որ Սյունիքի փոխմարզպետ Նարեկ Բաբայանը մարզպետարանի բոլոր աշխատողներին հանձնարարականներ է իջեցրել եւ մասնավորապես` պետական հիմնարկների, հատկապես դպրոցների տնօրենների քվեն ապահովելու խնդիր է դրել: Կրթության վարչության պետ Մերի Գանդալյանը հրաժարվել է ենթարկվել այս շանտաժին: Նրա նկատմամբ ճնշումներ են գործադրվել: Մեր աղբյուրն ասաց` ստիպել են աշխատանքից ազատման դիմում գրի։
Մենք կապվեցինք Մերի Գանդալյանի հետ: Նա ասաց, որ իրեն ասել են՝ դիմում գրի՛ր, գնա, բայց ինքը աշխատանքից ազատվելու դիմում չի գրել, իր նկատմամբ ծառայողական քննություն են սկսել.
«Ազատման դիմում չեմ ներկայացրել, ծառայողական քննություն է սկսվել պարզապես»,- ասաց Գանդալյանը։
Հարցրինք՝ ճի՞շտ է, որ իրեն ստիպել են ՔՊ-ի օգտին աշխատել, պատասխանեց․ «Ստիպելու բան չի եղել, պարզապես ինձ առաջարկել են` դիմում գրել, հեռանալ, ես ասել եմ, որ չեմ գրում»։
Պարզաբանել են, թե ինչո՞ւ են Ձեզ նման բան առաջարկում՝ հարցրինք Գանդալյանին, նա պատասխանեց․
«Դեռևս ոչ։ Ծառայողական քննությունը մինչև նոյեմբերի 9-ն է, լիազորություններս դադարեցված են, կսպասեմ ընթացքին»։