Պարգևատրում, քրգործի կասեցում, Փաշինյանի հետ հանդիպում․ քանաքեռցի «Տույը» սերտ կապեր ուներ իշխանությունների հետ

Այսօր Քանաքեռում սպանված քրեական աշխարհում հայտնի և մեծ հեղինակություն ունեցող քանաքեռցի «Տույի»՝ Արթուր Ղազարյանի և այս իշխանութունների սերտ կապի մասին բազմիցս է խոսվել։ Կան մի շարք փաստեր, որոնք ակնհայտորեն այդ մասին են վկայում։

Պատահական չէր, որ 44-օրյա պատերազմից հետո Արցախի նախագահի հրամանագրով «Տույը» պարգևատրվել էր մարտական զենքով։ Ըստ մամուլում տարածված տեղեկությունների՝ ցուցումը եղել էր Նիկոլ Փաշինյանի կողմից, իսկ վերջինիս բարեխոսել էր ԱԺ Իմ քայլը խմբակցության պատգամավոր Հայկ Սարգսյանը՝ Շիշ բռնողը։ Նկատենք, որ այդ ժամանակ մարտական զենքով պարգևատրվում էին այն անձինք, որոնք զգալի աջակցություն էին ցուցաբերել Արցախին ու ակտիվ մասնակցություն էին ունեցել ռազմական գործողություններին, սակայն, թե ինչով էր աջակցել Տույը՝ այդպես էլ չիմացանք։

Ավելին, 2019 թվականին «Տույ» մականվամբ հայտնի քրեական հեղինակության կողմից ենթադրյալ առևանգման դեպքի առթիվ հարուցված քրեական գործը կասեցվել էր ՀՀ քրեական դատավարության օրենսգրքի 31 հոդվածի 1-ին կետի 1-ին մասի հիմքով, այն է՝ հայտնի չէ անձը, որը գործով պետք է ներգրավվի որպես մեղադրյալ: Հիշեցնենք, որ 2018-ի հուլիսին քաղաքացի Արման Հակոբյանը ոստիկանություն հաղորդում էր տվել այն մասին, որ 2013թ. «Տույ» մականվամբ հայտնի քրեական հեղինակություն Արթուր Ղազարյանը և մի քանի անձ իրեն առևանգել են, 7-8 ժամ պահել անազատության մեջ, ծեծի ենթարկել և սպանության սպառնալիքներ տալու միջոցով պահանջել հրաժարվել իրեն պատկանող հացի արտադրամասի իր մասնաբաժնից, որի դիմաց խոստացել են վճարել 150.000 ԱՄՆ դոլար, ինքը ստիպված համաձայնել է կատարել նրանց պահանջը, սակայն վճարել են ընդամենը 10.000 ԱՄՆ դոլար: Դեպքի առթիվ հարուցվել էր քրեական գործ, բայց, փաստ է այն, որ Հայաստանում տեղի ունեցած իշխափոխությունից հետո Տույը պատասխանատվության չենթարկվեց։