Գիտնականները, որոնք փորձում են պարզել հաստ աղիքի քաղցկեղի հանելուկային տարածման պատճառը երիտասարդների շրջանում, ասում են, որ պարզել են այն մարդկանց խմբերին, որոնք ամենից շատ են ենթակա հաստ աղիքի քաղցկեղ ունենալուն, գրել է Daily Mail-ը։

Եկամտի ցածր մակարդակ ունեցող շրջաններում ապրելը եւ բժշկական ապահովագրության բացակայությունը կապված են մինչեւ 50 տարեկան այդ հիվանդությունից մահանալու բարձր ռիսկի հետ։ Հավանաբար, դա տեղի է ունենում այն պատճառով, որ բնակչության այդ խմբերը թեստավորում չեն անցնում եւ նրանց համար այնքան էլ հասանելի չէ բուժսպասարկումը, ինչը թույլ է տալիս քաղցկեղին տարածվել մինչեւ հայտնաբերվելը։

 

Հետազոտությանը, որն իրականացրել է Կալիֆոռնիայի համալսարանը, ԱՄՆ-ում մասնակցել է 18-49 տարեկան ավելի քան 20 000 պացիենտ կոլորեկտորալ քաղցկեղով, որոնք պատկանել են տարբեր էթնիկական խմբերի, հետազոտությունը տեւել է ավելի քան չորս տարի ախտորոշումը կայացնելուց հետո։ Նրանք հայտնաբերել են, որ մահացության մակարդակը բնիկ հավայցիների եւ Խաղաղօվկիանոսյան կղզիների բնակիչների շրջանում 34 տոկոսով ավելի բարձր է եղել, քան իրենց հասակակիցների մոտ։ Սեւամորթ մարդիկ 18 տոկոսով ավելի շատ են ենթարկվել բարձր ռիսկի, իսկ իսպանախոսները՝ 15 տոկոսով ավելի։ Հետազոտողները հայտնել են, որ այս անհավասարության պատճառը սոցիալ-տնտեսական գործոններն են, քանի որ այդ փոքրամասնություններն ավելի մեծ հավանականությամբ ապրում են այն շրջաններում, որոնցում բարձր է աղքատության մակարդակը եւ սահմանափակ է ֆինանսական, կրթական եւ այլ ռեսուրսների հասանելիությունը։ Նրանք նշել են, որ փաստացի տվյալների աճող քանակությունը նույնպես ցույց է տալիս, որ իսպանախոս մարդկանց շրջանում արագ ավելանում է հաստ աղիքի քաղցկեղով հիվանդացությունը վաղ փուլերում, ինչը «վկայում է այն մասին, որ անհրաժեշտ է ավելի շատ բան անել այդ խնդիրը լուծելու նպատակով ԱՄՆ այս մեծ էթնիկ խմբի համար»։