Սպիտակում այսօր վերջին հրաժեշտն են տվել նախօրեին տեղի ունեցած դանակահարության հետևանքով մահացած 17-ամյա Գրիշա Պողոսյանին։
Գրիշան ընտանիքի ավագ զավակն էր, ուներ երկու եղբայր, հայրն արտագնա աշխատանքով էր զբաղվում, մայրը՝ չէր աշխատում։ Գրիշան սովորում էր Սպիտակի քոլեջում՝ երկրորդ կուրսի ուսանող էր։
Սպիտակի քոլեջից «Փաստինֆո»-ի հետ զրույցում Գրիշա Պողոսյանին բնութագրեցին որպես կյանքով լի, ժպտերես, աշխույժ երիտասարդ, Գրիշան կոնֆլիկտային չէր ։ Դեպքի օրը՝ մարտի 18-ին, Գրիշան դասի է գնացել, դասերն ավարտվել են ժամը 13։20-ի սահմաններում, ցտեսություն է ասել ու գնացել։
«Նույնիսկ հերթապահը պատմում է, որ դեպքի օրը երկար հայացքով նայել է Գրիշային․․․ Դեպքը տեղի է ունեցել 14։30-ի սահմաններում»,- նշեցին քոլեջից՝ ափսոսանք հայտնելով դեպքի համար, նշում են՝ ցավում են՝ թե տուժողի համար, թե մյուս կողմի, որ կործանեցին իրենց կյանքը։
Սպիտակի համայնքապետը, որը ևս մասնակցում էր հուղարկավորությանը, ցավով արձագանքեց դեպքին, նշեց՝ թեև անձնապես ծանոթ չէ, սակայն տեղյակ է, որ խելոք, աշխատող ընտանիքի երեխաներ են՝ թե՛ տուժող, թե՛ մյուս կողմը։
Հիշեցնենք, որ մարտի 18-ին Լոռիում սպանություն է տեղի ունեցել։ Ըստ իրավապահ մարմինների՝ ժամը 14-ից 15-ն ընկած ժամանակահատվածում Սպիտակ քաղաքի գերեզմանատան տարածքում 20-ամյա և 22-ամյա եղբայրներն ու նրանց հորաքրոջ 20-ամյա որդին անձնական հարցերի շուրջ վիճաբանել են համաքաղաքացի 17-ամյա երիտասարդի հետ, որի ընթացքում 22-ամյա երիտասարդը դանակով հարվածել է 17-ամյա երիտասարդի կրծքավանդակին, ինչի հետևանքով նա մահացել է։ Ըստ ոստիկանության՝ վեճը եղել է 17-ամյա երիտասարդի կողմից 20-ամյա երիտասարդի կնոջը երկար նայելու պատճառով։ Հանցագործության գործիք դանակը հայտնաբերվել է։
Դեպքի առթիվ նախաձեռնվել է քրեական վարույթ՝ Քրեական օրենսգրքի 155-րդ հոդվածի 2-րդ մասի 5-րդ կետի՝ անչափահասի սպանության, 195-րդ հոդվածի 2-րդ մասի 5-րդ կետի՝ մի խումբ անձանց կողմից ֆիզիկական ներգործության, 334-րդ հոդվածի 1-ին մասի՝ ապօրինի զենք կրելու, 297-րդ հոդվածի 2-րդ մասի 1-ին կետի՝ մի խումբ անձանց կողմից խուլիգանության հատկանիշներով: Քրեական վարույթի շրջանակներում երեք անձ ձերբակալվել է։ Նշանակվել է դիակի դատաբժշկական փորձաքննություն։