Այսօր՝ մարտի 21-ին, խոշոր հրդեհ է տեղի ունեցել Երևանում։ Ինչպես հայտնում է Shamshyan.com-ը, ժամը 15։10-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Էրեբունի վարչական շրջանում՝ Խորենացի 112 հասցեում գործող ավտոտեխսպասարկման կետում հրդեհ է բռնկվել։
Ժամանել են Երևանի թիվ 3-րդ հրշեջ-փրկարարական ջոկատից՝ 1 մարտական հաշվարկ, 8-րդ և 2-րդ հրշեջ-փրկարարական ջոկատներից՝ 2-ական մարտական հաշվարկ։
Մինչ հրշեջների ժամանումը՝ ավտոտեխսպասարկման կետում առաջացած կրակի տարածման դեմ պայքարել են քաղաքացիները, ապա ժամանած հրշեջները մարել են այն։
Ըստ նախնական տեղեկությունների՝ հրդեհի հետևանքով 2 հոգի հոսպիտալացվել են «Այրվածքաբության ազգային կենտրոն»։
Հրշեջները մարել են կրակը, որտեղ հայտնաբերվել է ամբողջությամբ մոխրացած «Lexus» մակնիշի ավտոմեքենա, մոխրացել է նաև ողջ գույքը։
Դեպքի փաստով ոստիկանության Էրեբունու բաժնում փաստաթղթեր են ձևակերպվել, որոնք հնարավոր է փոխանցվեն ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին։
Ոստիկանությունում պարզում են ավտոտեխսպասարկման կետի սեփականատիրոջ, վիրավորների և մոխրակույտի վերածված «Lexus»-ի սեփականատիրոջ ինքնությունը։
Ավելի վաղ հայտնել էինք, որ Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Խորենացու փողոցում այրվում է ավտոմեքենա։
Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից երկու մարտական հաշվարկ։
Հայտարարվել է հրդեհի բարդության «1 ԲԻՍ» աստիճան: