«Լիարժեք առողջ մարդը գնում է հիվանդանոց և շուրջ 48 ժամ անց՝ մահանում»։ Այս մասին ահազանգում է մահացած Նարեկ Մկրտչյանի քույրը Նարինե Հայրապետյանը։ Նրա խոսքով եղբայրը՝ առողջ տղամարդ, օգոստոսի 22-ին հետույքի շրջանում ուժեղ ցավերով դիմել է Իզմիրլյան բժշկական կենտրոն։ «Բաժնի վարիչը եղբորս նայել է, և ուղարկել է սոնոգրաֆիայի, ասել, որ անհրաժեշտ է անհապաղ վիրահատություն»,- «Փաստինֆո»-ի հետ զրույցում նշեց մահացածի քույրը։
Բնակչուհու խոսքով՝ վիրահատությունից առաջ բժիշկը չի դիտարկել եղբոր անալիզները։ Չնայած վիրահատությունը ցուցված էր, բայց անալիզները պարտադիր պետք է դիտարկեին։ Մինչդեռ, ըստ մեր զրուցակցի, անալիզներով արդեն եղբոր մոտ եղել են արյան վարակի նշաններ։ Սակայն վիրահատող անձնակազմը՝ այդ թվում անեսթեզիոլոգը և վիրաբույժը, որևէ միջոցառում չեն իրականացրել վարակը բուժելու համար։
Բնակչուհու խոսքով ՝ մեկ օր անց եղբոր վիճակը կտրուկ վատացել է, նա ընկել է սեպտիկ շոկի մեջ, սակայն տվյալ բաժնի մի քանի բուժաշխատողներ կրկին ոչինչ չեն արել։ Մի քանի ժամ անց եղբայրը մահացել է։
Բնակչուհին ընդգծում է, որ իր դժգոհությունը վերաբերում է բժիշկների անփութությանը, ոչ թե հիվանդանոցի հետ որևէ անձնական խնդիր ունի։ Նա հավելում է, որ երկու տարի առաջ նույն կենտրոնում փրկել են հոր կյանքը։
«Փաստինֆո»-ն կապ է հաստատել Իզմիրլյան բժշկական կենտրոնի հետ։Մամուլի խոսնակը հաստատեց, որ նման դեպք եղել է՝ վստահեցնելով, որ բուժանձնակազմը կատարել է հնարավոր ամեն ինչ հիվանդի կյանքը փրկելու համար։ Մահվան պատճառների եւ բուժնանձնակազմի ձեռնարկած քայլերի մասին եզրակացություն կտա բժշկական հանձնաժողովը։
Նշենք, որ գործն արդեն գտնվում է իրավական տիրույթում։